Matthis的大世界 - 努力培養耐心

小嘉一直都好感恩
因為身邊有好多小天使
可以教導小嘉去教養Matthis

而其中一個小天使就係Hoiling EE喇~
由未有Matthis到大肚到生咗
小嘉都Keep住同hoiling &川川聯絡
見到川川既自律耐性
真係好羨慕...

而hoiling亦都毫不吝嗇同小嘉分享育兒既方式同睇法
所以小嘉有咩難題都會諗起hoiling

首先...講忍耐
其實呢個能力對小朋友真係好重要
呢家小朋友好缺乏呢個能力
想要咩就要,得唔到就會失控
其實就係無咗呢個能力
家長(尤其是長輩)以為小朋友有咩需要都滿足都係到佢地好
但其實咁反而係害咗佢地

因為小朋友從來無嘗試過失敗,得不到既感覺
但...人始終要面對負面既事情
如果小時無好好咁培養出面對呢種事情既能力
大咗..要佢地突然去面對係好辛苦好痛苦既事

所以小嘉唔會咩都就晒Matthis
而且亦跟隨hoiling EE既方法...延遲滿足

小嘉由Matthis10個月大左右開始訓練
方法其實好簡單...只係每餐開始時都要count 10
要望住D飯飯去等10聲
久而久之
Matthis呢家就算好想食
只要小嘉講:數十聲
佢就自己會收手...等
(當然間中有一次半次佢唔想等...但小嘉都會堅持)

而呢家呢個方法都開始擴充範圍
例如有時Matthis發脾氣想搶人玩具
小嘉就抱住佢要數10聲
基本上都可以成功

而最近...一件事令小嘉真係幾欣慰

看到這個背影嗎...充滿盼望XDDD

 

事情係...

當日Matthis勁想玩三輪車

其實同佢玩咗一陣

但堂家姐返咗嚟...而家姐好想同Matthis一齊出祠堂玩

不過家姐要先食埋下午茶先

於是...小嘉決定等埋一齊出

 

最初,Matthis喊晒要出去玩車車

但小嘉同佢係屋內行一個圈

佢冷靜咗D...

再同佢講:家姐都好想出去玩,不過要食埋嘢先,不如一齊等埋佢啦

重覆講咗兩三次

小嘉就由Matthis自己係屋玩

而小嘉就坐係梳化睇報紙

 

點知抬頭一望...就見到以上情境

Matthis坐係門口望住架車

但就無咗發忟...而係真係好似表現出一個努力等待既樣

 

小嘉真係好感恩

覺得Matthis真係明白亦願意等待

 

感謝天父帶領

小嘉知道教養Matthis仍有漫漫長路

願天父繼續保守

賜聰明智慧

更感謝天父賜下很多小天使在身邊