Health @ Money Money Money
計計吓小B係小嘉個肚都住咗成27wk喇!!!
婆婆一早同珍妮千叮萬囑
小B大約7-8個月時
要燉一次高麗參…這是給小B食的
話咁樣小B身體會強壯D
出世後都無咁易病
不過唔使燉得多…一次就夠喎~
咁小嘉都小心D問咗中醫先
中醫話食高麗參係完全無問題
而且仲養胎添~
佢試過有客因一D特別原因
開既藥都要有高麗參補住條氣
所以谷到個B好大隻…出世時8磅幾@@
所以…過多幾星期小嘉就要買高麗參啦!!
咁就搵吓資料…
諗諗吓…買開就要買埋坐月既補品
嘩!!唔計都好…一計….就係內心淌血呀!!!!!!!
首先…主要要買既藥材有:
1.
高麗參,但唔知要幾多...4兩定半斤呢???(上網睇完…都係買正官庄穏陣)
2.
鹿茸,陪月話買一條分8袋(陪月同D朋友話,我剛好冬天生,正正可以食鹿茸)
3.
冬蟲草,超貴!!!係咪真係好有用呢???
4.
海參,又要買幾多呢?餵人奶會唔會搞到D奶太膠???
5.
花膠,又係要買幾多呢?花膠唔食得太多,真係會令人奶變杰…咁係少少當食過吓就算???
以上係D較貴價既藥材,小嘉已經唔要燕窩,怕有D激素,但都有咁多樣…仲有D立立雜雜,好似:
紅棗/南棗,淮山,杞子,南北杏,桂圓…有D我都唔知係咩喇!!
咁樣買法,起碼都要五位數字!!!!
仲未計…陪月每日去街市買雞燉湯既錢…好貴呀!!!!
但…身邊個個都話一定要坐好月
唔係第日就C火…尤其是小嘉本身怕凍手腳冰冷既人
就可以好好襯呢個機會improve個體體(大執位???)
呢D錢,好似真係唔慳得…
唉…我仲未將呢個令上進不停淌血同心痛既消息話佢知….
等我問吓佢心目中諗住坐用買藥材用幾錢
再話佢知個令佢心碎既事實XDDDDD
呵呵~~
回覆刪除鹿茸好似好補喎?? 一向感覺上好似係男士既補品~ 其實坐月要食薑醋同埋雞酒等, 已經可以補, 我諗食埋高麗蔘應該夠, 進補太多會唔會唔太好? 我係食襯補品都會喉痛的人, 阿媽話我虛不受補喎~ 滋陰既食物會啱我多d~ 所以進補幾多其實都要睇本身體質, 唔好一次過買太多補品住, 萬一唔啱身體食, 就浪費咗d 錢~ 如果比我既話, 我會覺得冬蟲草係以上咁多種補身品中最好最有用的~ 因為所以師奶阿媽都係話冬蟲草最補氣最好~ (當然講緊靚既真貨蟲草la~ XD) 不過堅貴, 其他全部唔買, 淨係買冬蟲草嚟燉幾次補身都好吖~
回覆刪除乜原來花膠會令奶變杰? 海蔘只係高蛋白質同埋膠原, 其實食唔食都得吖~
[版主回覆10/16/2012 11:12:22]我都唔知食唔食得鹿茸呀!!我個陪月就話我冬天生,可以食到鹿茸(季節,夏天太熱會太燥!!),個陪月就唔會要我一定有呢D嘢,不過佢話如果我買咗呢D藥材,咁佢就會燉.
我諗住下星期去睇睇中醫,順便問吓佢我食唔食得鹿茸同埋要唔要食...不過我就大D機會收到呢D藥材,因為我係可以日日飲紅棗水都無事既人,都應該受到D勁D既補品,但我都係問過中醫穩陣D先~
如果我中醫話我唔使食鹿茸呢D,咁我都買返多D冬蟲草都好,但真係幾貴吓!!
係呀!!有D人食咗花膠,D奶會變杰,有D人就唔會,所以你第日都要睇情況,海參呢..我知係膠質多,唔知係咪食返嚟補吓D軟骨呢???係個陪月話可以買嚟燉,佢話海參都好喎...咁我其實唔太好呢D咁膠質既食物,所以都係買唔多,當係有食過吓咁就算~