My Lovely Home ... quick step地板99%完成喇@20.12.2010

由星期四開始鋪,星期日quickstep已經差不多九成九完成.

最初初盧總監(quickstep的工程總監)預計要用一星期安裝,但實質其實三四日左右,咦??!但係星期四做到星期一(執漏),用左五日喎,點解多左一日呢??

因為…星期五 時A 小姐去左現場睇,覺得有D地方鋪牆腳線會好肉酸(影響整幅牆既簡潔),而有D牆腳線太高唔靚…於是擾攘一輪,拖左日幾先可以再全速前進.

樓梯鋪左喇!!!估唔到啡啡地襯灰磚都幾型同幾靚喎~~

如果側面油返白色,我諗會sharp好多啦!

樓梯既邊邊未修口...今晚返去再望下變成點先!

wow wow wow ~~~

呢個係小嘉房既地板,其實本身小嘉唔太prefer用白色...想用埋country既自然橡木...

但因為A小姐設計我間房係希臘style...所以唔係藍就係白,所以佢就話揀白色會好D..

yeah!!出嚟效果好唔錯呀!!!好靚又型...期待feature wall同傢俬放埋一齊個樣呀!

呢個就係走廊位既修口喇!!!

我相信因為A小姐想成幅牆都好neat好simple,要白雪雪...所以先refuse用牆腳線...

不過...呢家會有條隙係地板邊同牆之間...聽quickstep師傅話,遲D油油個邊會批返靚靚既!

好喇!!呢個其實係同走廊用同一款木地板既客房...

原先想兩層用晒呢款...因為好鍾意country series既浮雕效果,踩落去軟淋淋,好正...

不過呢家得走廊同呢間房用咋!

三樓用了這個...較深色的...

這裡是放電視和鋼琴~~~

牆腳線好靚....呢個高度就剛剛好!!!

總結quickstep:

1.       售前服務: 都OK既,可以隨意拎samples,又唔會話迫你地落訂買貨.訂左貨都唔會話迫要用埋佢地既安裝服務.

2.      度尺服務: 因為有樓梯關係+有埋安裝保養,所以決定搵quickstep安裝埋,度尺既係quickstep的工程總監 盧 先生,人超級好,約第一次度尺時因為我們自己溝通上既問題,令到quickstep誤會不用來度尺,後來發現立刻通知quickstep,盧先生都趕來我們家,而且沒有任何微言,而度尺超仔細,我看過他畫的圖,簡直是一個超詳盡的平面圖,超正

3.      安裝服務: 安裝的是另一班較後生師傅,佢地都比較自己做自己事,so far都OK,而鋪樓梯既師傅好好,我上次見佢裝木板(鋪樓梯前要先在樓梯鋪木板)都唧勁多膠水,另一個師傅仲問佢仲乜用咁多,一支膠鋪一級樓梯都似.但呢個師傅話落多D貼實D,咁先穏,所以超讚.因為未真係做完成個安裝,暫時99%完成的都很好!

4.      安裝中的插曲: 因為A小姐對部份地方的要求,所以導致走廊位要拆走已裝既牆腳線,其實小嘉和上進都不知發生什麼事,因為我地根本唔係現場,而上進都有致電盧生,亦有表達不好意思(之後星期日,盧生親身到現場看過一篇,而上進都再次向佢表示不好意思時,盧生都說這是很平常事)

但想不到,反而門市小姐,多次致電來的時候,語氣都勁不滿兼不耐煩,與最初面談時很不一樣哦!我地都勁唔意思,但佢仲係度話我地個則師好多野改,又話我地拖住佢D師傅,又話D師傅趕住第二個job要做.呢點我地明白(雖然..盧生說過預了一星期安裝時間而實際只裝了五天,但亦明白快做完一天,他們又可以快完成其他工程),但我們都表達左歉意,而亦現場跟師傅說不好意思,他們亦沒問題.

但門市小姐在電話中的態度,令我覺得她有點像變了個人,佢仲表示因為我地改嚟改去,又話我地無啦啦要cut D牆腳線(呢過真係好無奈…因為師傅講返俾我地知,原來不嬲都可以改高度,我地亦都曾話牆腳線太高,但佢無話過我地知可以改,所以先搞到去到現場,則師有呢個要求先知原來可行囉!)

呢家地又鋪好喇,佢都未打過電話嚟話尾數係幾多,其實我懷疑佢係要退返錢,因為我地用左少左牆腳線,而上星期又一早俾多六千幾蚊P弟屋既尾數佢,所以都唔知佢想點…唉!本身一切好完美,俾呢位姐姐仔搞到要扣佢地少少分喇!