My Lovely Home ... 廚櫃材料@07 Oct 2010

呢幾日開始搵廚櫃既資料，小嘉同上進係呢方面係完全既零知識，上星期去到幫我地做廚櫃間公司，覺得佢地D做得好肉酸…感覺好老去，最唔鍾意係佢地接駁位大大條黑色邊係度，核突到爆。於是…見人地噴漆好似靚好多，就諗緊可唔可以用噴漆。

其實我地同D君提時，佢都話噴漆唔好，不過我地就都好concern個接駁位好肉酸，咁D君話其實D膠板都可以做到彎曲包邊，但小嘉心目中仲諗緊可唔可以木板飾面...

努力咁係網上搵資料，發現原來噴漆真係唔OK架，因為噴漆只可以係D纖維板同刨芯板(係咪即係蔗渣板呢??)度做，如果佢地做廚櫃…幾年貨仔就玩完啦!

而貼膠板其實都可以做到靚仔既效果(但唔明點解個間廚櫃公司，搞到咁樣衰囉…見到都唔開胃呀!!!)

但係膠板都有好多牌子，而當中應該最多人話好既就係西德板喇!!於是小嘉噚日襯住lunch time有時間，去左一間叫「買料易」既舖到望望，事關西德板香港代理個website有呢間舖名…

其實去到，已經見到佢地掛左好多板出嚟，但當中最大大隻字既係「取樣板每件五元」，吓???!咁都得…我係網上見人地係旺角拎可以唔使錢任拎…不過…算啦!小嘉揀左四塊唔同既白色板，打算「豪洗」$20喇!!不過小嘉都有少少野想問，咁見到間舖有個女職員同D客傾緊，小嘉都諗住等一等，點知…突然有把女聲問我係咪有野問，原來…有一男一女既職員坐左係入少少位置…完全望佢地唔到囉!

小嘉行到上前，就問下D板係咪都可以用係廚櫃，點知個女職員態度極差，佢大大聲咁話:每塊樣板要俾$5喎!!乜我有話唔俾咩!乜我唔識字咩!!如果我諗住唔俾，我就直頭唔會行入嚟啦!拎左就走人。

我無理佢，又再重覆一次問佢呢D板係咪可以係廚房用，佢就當我係傻咁話:呢D係膠板…其實我諗可能係我表達能力太差，佢聽唔明…於是我就問佢:呢D板表面咁凹凸，用係廚櫃度O唔OK(，我諗住佢係職員，應該會有專業D..)點知…佢仍然個句:呢D咪係膠板嚟囉!!OK!收到…原來唔係我表達能力差…係佢理解能力低。

之後，小嘉問佢呢D板大約幾錢，於是呢個唔知禮貌係咩既職員就話:好難講喎…四百幾至一千都有啦!!

係呢個時候，小嘉發現原來我既忍耐力都幾高，於是我再詳細伸埋隻手俾佢睇到我拎既四張樣板，問清楚佢:咁呢幾塊大約幾錢呢…於是佢好迫於無奈咁瞄左一瞄(係真係用對眼瞄下咁既樣>.<)，然後話…六七百啦!

好!我費事問佢喇!於是我好有禮貌咁俾左二十蚊佢，佢就好求其咁寫張單話如果係間舖訂貨，可以退返…於是，小嘉自己犯賤，又問佢…咁呢四塊野使唔使俾返佢地(小嘉心諗…咁你退返錢俾我，我應該要還返啦!)，點知呢個女人…佢好大聲又粗魯咁話…我地只係認單!!!我夠知你認單啦，我係問你要唔要還返個四塊板呀，如果唔認單，你寫張單俾我做咩呀!!真係豬呀!!!!!!!

可惡!其實本身serve緊人個職員俾我感覺幾有禮貌，但係就係呢個女人…搞到成間舖形象衰晒!!唔怪得今朝睇報紙，都話香港既服務態度係亞洲排第七啦!

好!返回主題，咁係大約知道個價後，小嘉同上進計過數，成個廚櫃轉用西德板都應該唔洗加好多錢!睇下今日放工會唔會去灣仔D廚櫃舖格下價…起碼知道3萬蚊做到咩料，到時有bargain power去拗嘛!

voicexml