My Lovely Home ... 廚櫃の決定@富輝

登登登登...廚櫃公司,我地已經決定左喇!!!

因為時間真係太緊迫,所以上進噚日放工都即刻去旺角,

壞人J介紹那間廚櫃公司再看看,上進超爆醒,因為B君同壞人J未到,

上進先扮客問晒D價,等到壞人J一嚟到,老闆娘自知衰左,

即刻捉住壞人J自首,我地知道晒個價錢,佢唔可以玩野啦!

其實呢間舖既門面真係唔太靚,不過上進超仔細睇過手工,實在又同美廚唔太大分別,上進話做得唔好既係防火膠板既邊位,D膠水整到出左界,不過估到時應該會做返好啦!!!

不過超搞笑囉!我地上美廚,一直都想要西德既白木紋款,但係美廚本Sample貼左售馨,又話係西德板既sale講無貨,所以佢地話全香港都無架喇!!

但係噚日上進係呢家廚櫃公司度睇西德板時,咁橋西德板既sales係度,問過佢話白色木紋有貨,咁真係唔知點解美廚話無喇???

因為上進一早問左老闆娘價,所以都知道平美廚少少,最主要係Corian佢地加厚只要加$50一尺,呢度已經差成幾千蚊.

上進再同B君傾過,總之兩間廚房夾埋唔超過$60,000就揀咩都OK啦!

所以我地應該可以唔使加任何錢就有西德板+暗白紋Corian喇!!!

但係因為我地有個高櫃用嚟遮住個洗衣機,呢個我地一早知係VO嚟,

所以上進 都問B 君點計數(呢間廚櫃收$1500一尺,我地要做兩尺半,所以要補$3750),

但係B君話算啦!唔收我地,幫我地做埋...

yeah!!!!!!又慳返幾千蚊喇!!!!!我估呢間公司應該俾B君佢地個價會再低D,

所以B君係呢間廚櫃公司,有好多野都無所謂,唔收我地錢,如果係美廚就咩都要計返喇>.<

基本上,上進同B君睇完後,B君都問我地想揀邊間,其實佢都無所謂,

不過因為真係好趕(十二月二十日要咩都搞掂!!),

所以都叫我地今日之前決定好,如果係揀呢間,佢就要安排今日即刻入去度尺.

上進都打左俾師傅JJ,問問佢可唔可以盡量做到兩個廚櫃收$60,000.

所以我地都要等師傅JJ既報價再決定.

噚日十一點幾,師傅JJ報價嚟,都係太貴喇!

所以即刻決定俾返最初呢間廚櫃公司做,至於美廚,我地唔理佢喇!!!

佢地實在太無交帶,我地等左佢幾日都無報價,又唔打電話嚟,

我地再打俾佢,佢就話sent左俾我,但我check極都無...

於是佢補sent啦!!哈!!我知點解我收唔到啦!!個e-mail address錯左,

大佬你之前sent個野俾我架!上星期你地都試過一次話sent左我收唔到,

我都再一次講左個e-mail俾你地,你地都sent都P弟既報價,

轉個頭又用返錯既e-mail address...你地點搞架!!

同埋sent左個報價俾我地又話會通知,但係完全無囉!!!

電話都無個...我諗呢間公司真係太多生意,所以根本應付唔到,

唔怪得09年中都見有人讚佢地,但之後就無晒影

(不過...中肯講句,咁都無咩negative comments既).

小嘉決定唔會主動再搵美廚,佢地根本無在意有無我地呢單生意,

如果佢地突然醒起我地,唯有講句:乜你地有興趣做我地生意咩??

我見你地都唔覆又唔俾圖(佢原先話呢個星期初俾我地),

我以為你地唔想做咋,你等得我地唔等得,搵左第二間lu~~~再加大笑三聲...哈哈哈!!!!!!

呀!!!無記錯,我地呢家搵個間叫富輝,佢門面真係唔太好,

最大問題係bad taste,佢地D陳列設計好老土,

不過...手工係點要收貨至知,所以如果手工好,想搵佢地做,最好自己有晒idea囉!