My Lovley Home の Day 215 to 216 Part II

而家小嘉每回返去望,都會好認真好努力咁去睇每一個細節…

然後努力對比腦裡面既資料...因為嘉爸真係無講錯---無一個泥水係唔呃人架!!!!!!

星期六返去睇,小嘉入去樣品廁所望望…咦??做左防水未呢??

見到幅牆鋪磚喎!!!於是問師傅,佢話只係企缸位會做防水,

企缸出面其實好少會有大量水,所以唔需要做.講真,

你問小嘉,我梗係想做晒架!但佢咁講我咁聽啦!但係都繼續諗諗諗...

加上A小姐會入嚟,可以問佢意見.

點知,一望個企缸…嘩嘩嘩!!咪玩啦!!個高度做到1000都唔知有無,到我腰咋…

我老公成六呢高,一淋水…高出一倍啦!!!

即刻捉左個判頭講,起碼要做到我老公個頭殼頂咁高啦!!我地好人慈喇!

我見人地成個浴室做到上天花架!!!

後咪A小姐嚟左,B君又係度…上進即刻走去問…

小嘉又再同時去望望幅牆…其他為無做防水好唔安樂...

問問鋪緊磚個師傅,佢夠膽死話做左…我問…做左去邊…一指…

嘩!!唔該晒,原來做左5cm咁高囉!佢仲話…拖地D水都去唔到咁高呢!

(不過唔好意思…我慣左如果洗廁所...係一野就用花酒係咁淋D牆…

呢家唔敢啦!只可以用海棉拖>.<)

當上進 仲同B 君傾緊時,小嘉問(我係二樓佢地係地下)防水點呀??

B君話會做到300喎!!吓??呢家得50咋喎!!!

B君仲話做左…我忍唔住…話佢知…5cm咁高咋喎!!!

一來我地出到聲,二來A小姐大大個企係度,B君即刻吩咐壞人J叫人改.

哈!!轉個頭,師傅叫我去望...終於做返一尺高喇!!

你之前做足工夫,咁咪唔使又拆又鋪囉!都唔明…

點解佢地D天性咁怪,係要搏得就搏...不過你地真係搵錯人嚟搏...

感恩,天父都讓我每次都發現問題,再加埋宇爸宇媽煩人攻勢,

一批又一批判頭及師傅,呢家咪就係偷雞唔著蝕渣米囉!!!自己攞嚟衰,哼~

多謝教會弟兄介紹...原來呢樽叫風媒樽...用嚟燒桿既!

 

會安裝冷氣既位置已鑽喉位~

 

廁所喉去水位...睇住原先靚靚既牆無左一忽...個心好痛呀~~

 

門口用木框預留位置...將來門框只要一塞...咁就搞掂喇!

 

玻璃底框開始批盪喇!!!

 

二樓樣品廁所...企缸位倒第二層防水料!

 

浴室水喉位....冷係左手,熱係右手~

 

二樓走廊玻璃底...都批左喇!!!

 

經過一致既贊同...二樓上三樓改回用石樓梯...

 

師傅星期日就鋪好...

 

三檈已經批好纖維灰喇!

 

突然發現...三樓廁所結左磚牆喎!

 

三樓studyroom位置...起返半身高既牆,上面係大大塊既玻璃窗^^

 

露台既玻璃底都批返靚仔喇!!!

 

呢個係用嚟批廁所牆既防水料...sika的!

 

呢個唔知咩東東...問判頭佢話五星粉(啞...因為個圖案係五星)...佢話係快乾英泥...不過...呢家其實無用,訂定先,萬一有用可以即刻攞嚟用喎!