婚禮第十二章の我們的花球@欣欣花店III

終於去到十一月喇!小嘉見過姊妹十月用既花球,真係好靚呀!!信心返晒黎,於是小嘉個日同埋上進去訂花喇!!!

其實小嘉要訂都算多既鮮花,一個白色花球,一個粉紅色花球,十個襟花,一盆聖壇獻花,一盆證婚書裝飾花…

首先講下個白色花球,其實杜生杜太有超多花球書,日本歐洲都有,不過…日本既我會接受到多D,歐洲個D太前衛喇!!!

白色花球,小嘉一心已經決定要用白色牡丹,杜生一聽就話都幾貴喎,小嘉即刻心都寒左D…咁小嘉問要幾錢哎…唔..佢話….要…六百幾七百啦!!下???!小嘉係出面格價只平都要差不多一千啦!於是,擔心既小嘉再問…如果花球有大白牡丹加小白牡丹咁又要幾錢呢??

杜生又話,呢兩隻花都好貴,要成百幾蚊一扎喎…唔唔…小嘉心諗…應該要過千…點知…八百五十蚊咋!!!!!

好開心呀!!!即刻同上進講好想要呢個大小白牡丹花球…於是呢個花球既成份就有:大白牡丹,小白牡丹,淡黃桔梗,同埋一D襯花!到真係到手個日…真係靚到唔捨得放手呀!!!

   

好靚好靚的白色大牡丹,白色小牡丹,仲有D淡淡黃色既桔梗...又有D果實咁樣既襯花同銀色既葉...好靚呀!!!



          

呢個就係白色花球既襟花...都係超靚呀!!!!



          

睇下,襯埋教堂同頭紗...超靚呀!!!



跟住,因為小嘉想出門時有個紅色D既花球襯返套褂,而且行教堂時又可以俾伴娘用,所以又訂多個喇!杜生初時建議用淡色既玫瑰…但小嘉唔太喜歡玫瑰,,於是係咁揭D日本花球雜誌,咦!!!見到個好Cute好靚呀!!係用一D細花做成,但係杜生話個D花香港無入口,如果真係要入就真係非常貴…同埋…個時唔當造,於是…小嘉又掛住D peony喇!!就問如果用粉紅色小牡丹得唔得呢?於是…呢個花球的材料就有…粉紅色小牡丹,有D粉色紅色玫瑰,又有唔記得咩色既桔梗..盛惠$650(唔記得係$750定$650喇!)

   

呢個粉紅色花球...一樣令人愛不釋手呀!!!



   

襯褂又得...



           

做伴娘march in時既花球都一樣超靚!!!



   

隨球附送既襟花...都係好靚架!!!



接住就係襟花,因為要大體D同埋俾長輩用,所以用左惠蘭…唔記得幾錢=.=

             

惠蘭襟花..仲有D小花配埋添...好靚呀!!!



大大盆獻花,由唔知咩百合花同其他花組成,都好大盆好靚(不過無咩相係直接影佢,所以show唔到出黎),都好平呀!三百大元成交!!

最後,小嘉意料之外的證婚桌鮮花…我知會用玫瑰,訂花時杜生show過俾我睇,係一種米白色既玫瑰,又唔係香檳色又唔係白色…係米白色,咦!!呢個玫瑰小嘉反而覺得真係幾靚喎!連埋個靚靚正方形玻璃盆都係百三蚊左右…小嘉都無諗過會點…心諗都係一扎花插係個盆算…點知…當日見到…嘩!!!好靚呀!!!

              

呢盆真係諗都無諗過咁靚既證婚桌花...D米白玫瑰真係好靚,又有小小桔梗做襯托,而一粒粒好似荔枝既襯花真係靚爆,百三蚊左右,超抵呀!!!!



所以小嘉超感恩,俾我還到咁好的花店,買咁多鮮花都係二千四左右,好抵,杜生杜太又好好人,佢地會俾好多唔同意見我地,又唔會因為賺多D而揀D貴花,反而真係我地知咩花貴咩花當造…所以…真係好正啦!!
呀!!差D唔記得講…D花原來真係可以放好多日呀!!無論玫瑰,peony定係桔梗…五日後都真係仲OK,我去完旅行返屋企(約婚後十七日左右),D花竟然無甩花瓣!!當然,已經有少少皺啦!!但真係好Good呀!!!